INSTITUTIONES

 

DOCTRINAE

 

CHRISTIANAE,

 

SIVE

 

CATECHISMUS

 

AD USUM SEMINARIORUM

 

AUCTORE

 

P. L. DANES

 

––––––––––

 

PARS PRIMA.

 

DE FIDE ET SYMBOLO; ITEM DE SACRAMENTIS ET CAEREMONIIS ECCLESIAE

 

–––––––––

 

SECTIO PRIMA.

 

DE FIDE ET SYMBOLO

 

–––––––

 

CAPUT XV

 

De Christi baptismo, jejunio, tentatione et vocatione discipulorum

 

––––

 

QUAESTIO 1. Quid de BAPTISMO Jesu Christi narrat historia evangelica?

 

R. Haec sequentia: (2) Anno quintodecimo imperii Tiberii Caesaris, procurante Judaeam pro Romanis Pontio Pilato JOANNES Zachariae filius e deserto Judeae, in quo ab ineunte aetate vixerat, in publicum prodiit. Austeritate vitae veteres prophetas superabat. (3) Victum ei praebebant locustae et mel silvestre: vestitum exhibebant duri camelorum pili, et zona pellicea.

 

Praedicabat interim, omnesque ad poenitentiam hortabatur, (4) dure redarguens Pharisaeos ac Sadducaeos, et (5) cuilibet hominum generi praescribens ea, quae salutariter observarent; magnam quoque hominum multitudinem in aquis Jordanis fluvii baptizabat, unde Baptistae nomen obtinuit.

 

Cum itaque universi populi admirationem et venerationem provocasset, (6) in suspicionem plerique adducti sunt, eum esse Messiam illum tot retro saeculis exspectatum. At Joannes (7) ingenue professus est, non esse se nisi Messiae praecursorem, a Deo missum, ut illi viam praepararet.

 

Q. 2. Eratne Baptismus Joannis efficax ad remittenda peccata?

 

R. Non erat nisi sancta quaedam caeremonia, quam qui subibant, et poenitentiam solemniter profitebantur, et ad remissionem peccatorum, per Christum obtinendam, disponebantur.

 

Q. 3. Numquid cum caeteris etiam Christus a Joanne baptizari voluit?

 

R. Voluit plane, (8) JOANNE frustra reluctante: tum ut humilitatis exemplum nobis daret, tum ut sui sancti Corporis contactu sanctificaret aquas, quibus in suo postmodum baptismo obtinenda erat remissio peccatorum.

 

Q. 4. Quaenam baptizato Christo miracula contigerunt?

 

R. Haec tria: 1° Cum Jesus baptizatus de aqua ascenderet, (9) aperti sunt ei coeli.

 

(10) Descendit in ipsum Spiritus sanctus corporali specie, sicut columba.

 

3° De coelis vox audita est, dicens: (11) Hic est Filius meus dilectus, in quo mihi complacui.

 

Q. 5. Quo se post baptismum suum Jesus Christus contulit?

 

R. (12) Agente eum Spiritu sancto, secessit in desertum, ubi quadraginta dierum JEJUNIUM absque omni cibo peregit. Cum vero post haec esuriret, diabolus scire percupidus, isne ille esset qui coelesti voce denuntiatus erat Filius Dei, variis modis eum tentare aggressus est, quod Jesus permisit, tum ut se vere hominem esse monstraret, tum ut nobis vincendi exemplum, et fiduciam daret.

 

Omni tentatione superata, (13) Ecce Angeli accesserunt, et ministrabant ei.

 

Q. 6. Quid deinceps fecit Salvator noster?

 

R. (14) Ministerii sui functiones exorsus est, quae quidem eo spectabant ut Messiam se probaret, salutarem homini veritatem ostenderet, eumque peccato perditum Deo reconciliaret. Primum patrando miracula, secundum praedicando, tertium moriendo perfecit.

 

Q. 7. Quomodo functiones istas Servator exorsus est?

 

R. Imprimis illi cura fuit, ut perpetuos quosdam suorum operum, ac doctrinae testes, futurosque (15) EVANGELII praecones sibi adjungeret, quorum aliqui ad primam Christi vocem, relictis omnibus secuti sunt eum. Sic (16) Simon Jonae filius, cui Petri nomen imposuit, et Andreas frater ejus, ambo piscatores; sic Jacobus et Joannes frater ejus, Zebedaei filii, itidem piscatores; sic (17) denique Matthaeus (18) publicanus, aliter Levi dictus, e telonio Christum secuti sunt.

 

Cum autem discipulorum non exigua multitudo illi jam adhaereret, quos et peculiariter instruebat, et turbis ad se venientibus baptizandis adhibebat, post quamdam noctem orando transactam, ex omnibus ad se vocatis duodecim elegit, quos, utpote legatos suos, (19) APOSTOLOS nominavit.

 

Q. 8. Recense 12 apostolorum nomina.

 

R. (20) Primus Simon Petrus, et Andreas frater ejus; Jacobus, et Joannes frater ejus, Zebedaei filii; Philippus et Bartholomaeus; Thomas et Matthaeus publicanus; Jacobus Alphaei filius, et Judas sive Thaddaeus frater ejus; Simon Chananaeus, et Judas Iscariotes magistri sui proditor.

 

Q. 9. Cur Petrus apostolorum PRIMUS dicitur?

 

R. Quia electionis suae beneplacito caeteris eum praetulit, omniumque caput constituit ipse Salvator; cum enim quadam die interrogasset discipulos, quid de ipso crederent, illico respondit PETRUS: (21) Tu es Christus Filius Dei vivi. Cui Salvator: Et ego dico tibi quia tu es Petrus, et super hanc Petram aedificabo Ecclesiam meam, et portae inferi non praevalebunt adversus eam: et tibi dabo claves regni coelorum, et quodcumque ligaveris super terram, erit ligatum et in coelis, et quodcumque solveris super terram, erit solutum et in coelis. Quam quidem promissionem tunc Christus implevit, quando post resurrectionem suam, totius illi gregis sui curam, omniumque fidelium regimen demandavit, dicens: (22) Pasce agnos meos... Pasce oves meas.

 

Q. 10. Cui muneri electos a se apostolos deputavit?

 

R. Misit eos praedicaturos advenisse (23) regnum coelorum, id est felix illud tempus quo cuncti vocarentur ad cognitionem veri Dei, et spem vitae aeternae; misit autem hactenus ad Judaeos tantum, necdum sinens ut ad Samaritanos, aut Gentiles diverterent.

 

Dedit porro illis potestatem, (24) ut infirmos curarent, mortuos suscitarent, leprosos mundarent, daemones ejicerent, mandans ut quod gratis acceperant, gratis darent: Dei providentiae fiderent, et illum solum timerent.

 

Cum simili postmodum potestate, similibusque mandatis (25) alios septuaginta duos misit ante se Dominus Jesus, in omnem civitatem et locum, quo erat ipse venturus.

 

–––––––––––

 

 

Institutiones Doctrinae Christianae, sive Catechismus ad usum seminariorum. Auctore P. L. Danes. Editio nova, caeteris correctior. Mechliniae, P. J. HANICQ, TYPORGR. ARCHIEP. MECHL. CUM APPROBATIONE. 1839, pp. 49-52.

 

Notae:

(1) 1 Pet. II, 21.

 

(2) Luc. III, 1.

 

(3) Matth. III, 4.

 

(4) Matth. III, 7.

 

(5) Luc. III, 11.

 

(6) Luc. III, 15.

 

(7) Joann. I, 20.

 

(8) Matth. III, 15.

 

(9) Matth. III, 16.

 

(10) Luc. III, 22.

 

(11) Matth. III, 17.

 

(12) Matth. IV, 1. Luc. IV, 1.

 

(13) Matth. IV, 11.

 

(14) Jesus tunc erat annorum circiter 30. Luc. III, 23.

 

(15) Evangelium vox graeca laetum nuntium sonat, utique redempti generis humani.

 

(16) Matth. IV, 18.

 

(17) Matth. IX, 9.

 

(18) Publicanus dicitur qui redempta a se vectigalia recipit.

 

(19) Luc. VI, 13.

 

(20) Matth. X, 2. Luc. VI, 14.

 

(21) Matth. XVI, 16.

 

(22) Joann. XXI, 15 et seqq.

 

(23) Matth. X, 7.

 

(24) Matth. X, 8 et seqq.

 

(25) Luc. X, 1.

 

© Ultra montes (www.ultramontes.pl)

Cracovia MMXVI, Kraków 2016

Reditus ad indicem operis Sac. Petri Ludovici Danes

Institutiones Doctrinae Christianae

sive

Catechismus nova methodo concinnatus

 

POWRÓT DO STRONY GŁÓWNEJ: