MANUALE PRECUM

 

IN USUM

 

THEOLOGORUM

 

––––––––

 

Meditationes

 

––––––

 

Ecce homo!

 

Ecce homo! Vide in eo 1. Dei amorem a) Patris, qui unicum dilectissimumque tradidit Filium – in tot cruciatus tantamque ignominiam – pro servis vilissimis, contumacibus, rebellibus; b) Filii, qui tantos suscipit dolores, angores, ignominias – licet praevideat, vix ullam sibi habendam gratiam, immo novis peccatis rependendum.

 

2. Peccati horrorem, a) quod tam dire torquet Redemptorem amabilissimum; b) quod magis deformat et deturpat animam peccatoris, quam sputa et vulnera deformaverant corpus Salvatoris; c) quod nonnisi tantis Christi poenis poterat deleri.

 

3. Virtutum splendorem, imprimis a) oboedientiae, cum atrocissima, quae Pater ei destinaverat, subeat sine murmuratione, cunctatione, reluctatione; b) mansuetudinis et patientiae, cum de iniuriis infandis non irascatur, non ulciscatur, sed tacens lubensque eas perferat; c) humilitatis, cum ut hominem vilissimum, peccatorem, malefactorem scelestissimum tractari se sinat; d) caritatis, cum, nulla sui ipsius ratione habita, offensores ingratissimos tantopere diligat omniaque sustineat Patrique offerat pro eorum salute.

 

–––––––––––

 

 

Manuale Precum in usum Theologorum. CUM APPROBATIONE REV. ARCHIEP. FRIBURGENSIS. Editio tertia. Friburgi Brisgoviae. B. Herder. TYPOGRAPHUS EDITOR PONTIFICIUS. [1912], p. 274.

 

© Ultra montes (www.ultramontes.pl)

Cracovia MMXVI, Kraków 2016

Reditus ad indicem:

MEDITATIONES

 

POWRÓT DO STRONY GŁÓWNEJ: