MANUALE PRECUM

 

IN USUM

 

THEOLOGORUM

 

––––––––

 

Meditationes

 

––––––

 

Christus pastor noster

 

1. Christus est pastor noster, qui a) pascit nos doctrina, qua coelestia nobis aperit mysteria viamque ostendit; exemplo, quo doctrinam suam illustrat et in via ad coelum nos praecedit; gratia, qua ad ambulandum hanc viam nos allicit et confortat; corpore suo, quo animam nostram nutrit. b) Defendit nos per praesentiam et custodiam, cum ubique et specialiter in Ss. Sacramento nobis adest, nos intuetur, lumen viresque nobis suggerit, inimicos arcet ac comprimit; per orationem, cum semper pro nobis interpellat, imprimis in missae sacrificio; per ministerium vicariorum suorum. c) Quaerit nos, si erravimus, sustinet scl. peccantes, luget, vocat perditos, benigne recipit, immo reportat revertentes.

 

2. Ergo a) simus oves, imitantes ovilem innocentiam, mansuetudinem, patientiam. b) Simus oves eius, dum eius vocem audimus, doctrinam et exemplum meditamur, sequimur, in quovis periculo ad eum confugimus, eius auxilium imploramus eique cooperamur, carne sua dignissime vescimur et, si ab eo per peccatum discessimus, quam celerrime revertimur et eo arctius ei inhaeremus.

 

–––––––––––

 

 

Manuale Precum in usum Theologorum. CUM APPROBATIONE REV. ARCHIEP. FRIBURGENSIS. Editio tertia. Friburgi Brisgoviae. B. Herder. TYPOGRAPHUS EDITOR PONTIFICIUS. [1912], pp. 269-270.

 

© Ultra montes (www.ultramontes.pl)

Cracovia MMXVI, Kraków 2016

Reditus ad indicem:

MEDITATIONES

 

POWRÓT DO STRONY GŁÓWNEJ: