DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE PARTIS

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO CIX

De ordinatione malorum angelorum

IN 4 ARTICULOS DIVISA

1. – Utrum ordines sint in daemonibus.

Co. – Daemones neque sunt neque fuerunt in ordinibus angelorum secundum statum gloriae, fuerunt autem secundum statum gratiae, qua poterant mereri; et perseverant in ordinibus secundum id quod est naturae.

2. – Utrum in daemonibus sit praelatio.

Co. – Cum daemones non sint secundum naturam aequales, necessum est inferiorum quoque actiones actionibus superiorum subesse, atque ita naturalis subjectio et praelatio in illis est.

3. – Utrum in daemonibus sit illuminatio.

Co. – Quamvis per aliquam veritatis manifestationem sibi invicem lumen praestare videantur daemones, non tamen illuminant proprie, cum omnia a Deo avertere studeant.

4. – Utrum boni angeli habeant praelationem super malos.

Co. – Praelatio primo Deo competens a creaturis participatur, et a perfectioribus maxime; boni igitur angeli super malos praelationem habent.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 67-68.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: