MEDULLA S. THOMAE AQUINATIS

 

PER OMNES ANNI LITURGICI DIES DISTRIBUTA

 

SEU

 

MEDITATIONES

 

EX

 

OPERIBUS S. THOMAE

 

DEPROMPTAE

 

AUCTORE

 

P. D. MÉZARD
 
ORDINIS PRAEDICATORUM

 

––––––––

 

PRIMA PARS

 

––

 

DE TEMPORE ADVENTUS AD FESTUM SS. CORDIS JESU

 

–––––

 

16 Januarii

 

De triplici vino

 

VINUM NON HABENT. Joan. 2, 3.

 

Ante Incarnationem Christi triplex vinum deficiebat: scilicet justitiae, sapientiae et caritatis seu gratiae.

 

I. – Vinum enim mordicat et quantum ad hoc justitia dicitur vinum. Luc. 10. Samaritanus vinum et oleum apposuit vulneribus sauciati, id est cum dulcedine misericordiae severitatem justitiae. Ps. 59, 5: Potasti nos vino compunctionis.

 

Vinum etiam laetificat cor, juxta illud Ps. 103, 15: Vinum laetificat cor hominis. Et quantum ad hoc dicitur vinum sapientia, cujus meditatio maxime laetificat. Sap. 8, 16: Non habet amaritudinem convictus illius.

 

Vinum similiter inebriat. Cant. 5, 1: Bibite amici et inebriamini carissimi. Et secundum hoc caritas dicitur vinum. Cant. 5, 1: Bibi vinum meum cum lacte meo. Et dicitur caritas etiam vinum ratione fervoris. Zach. 9, 17: Vinum germinans virgines.

 

II. – Et quidem justitiae vinum deficiebat in veteri lege, in qua justitia imperfecta erat. Sed Christus eam perfecit. Matth. 5, 20: Nisi abundaverit justitia vestra plus quam scribarum et Pharisaeorum, non intrabitis in regnum coelorum.

 

Deficiebat etiam vinum sapientiae, quae erat occulta et figuralis. Omnia in figura contingebant illis. Sed Christus eam manifestavit. Matth. 7, 29. Erat enim docens eos, sicut potestatem habens.

 

Sed et vinum caritatis deficiebat ibi, quia acceperant spiritum servitutis tantum in timore. Sed Christus aquam timoris convertit in vinum caritatis quando dedit spiritum adoptionis filiorum in quo clamamus: Abba, Pater, et quando caritas Dei diffusa est in cordibus nostris (Rom. 8, 15; 5, 5).

 

(In Joan., II).

 

–––––––––––

 

 

Medulla S. Thomae Aquinatis per omnes anni liturgici dies distributa seu meditationes ex operibus S. Thomae depromptae. Auctore P. D. Mézard, Ordinis Praedicatorum. Tomus I. Parisiis [1906], pp. 112-113.

 

© Ultra montes (www.ultramontes.pl)

Cracovia MMXVII, Kraków 2017

Reditus ad indicem operis P. D. Mézard OP

MEDULLA S. THOMAE AQUINATIS

 

POWRÓT DO STRONY GŁÓWNEJ: