DIVI THOMAE AQUINATIS

DOCTORIS ANGELICI

TOTIUS

SUMMAE THEOLOGICAE

CONCLUSIONES

–––––––––––––––––––––––

PRIMAE SECUNDAE

SUMMAE THEOLOGICAE

CONCLUSIONES

~~~~~~~~~~~~~~~~~~~~

QUAESTIO XXVIII

De effectibus amoris

IN 6 ARTICULOS DIVISA

1. – Utrum unio sit effectus amoris.

Co. – Cum amor ad quaerendam amati praesentiam moveat, duo aliqua copulare appetens, unionem effectum amoris esse constat.

2. – Utrum mutua inhaesio sit effectus amoris.

Co. – Cum amor faciat amatum in amante esse, et vicissim amantem in amato, oportet mutuam inhaesionem effectum amoris esse.

3. – Utrum extasis sit effectus amoris.

Co. – Amor in vi apprehensiva extasim parit dispositive, afficiendo videlicet amantem ad cogitandum de re amata; in vi autem appetitiva, directe et simpliciter amor amicitiae facit extasim; sed non amor concupiscentiae, nisi secundum quid.

4. – Utrum zelus sit effectus amoris.

Co. – Zelus, cum sit vehemens motus amantis in rem amatam, amoris effectus necesse est.

5. – Utrum amor sit passio laesiva amantis.

Co. – Amor cujuscumque boni convenientis, ut Dei, perficit amantem, disconvenientis vero, sicut peccati amor, amantem laedit; generaliter tamen propter excessum immutationis corporalis omnis amor laesivus dici potest.

6. – Utrum amor sit causa omnium quae amans agit.

Co. – Quodlibet agens ex amore agit quodcumque agit, cum ex intentione finis et boni operetur.

–––––––––––

Divi Thomae Aquinatis, Doctoris Angelici, totius Summae Theologicae Conclusiones. Parisiis. APUD A. ROGER & F. CHERNOVIZ, EDITORES. M D CCC XC (1890), pp. 94-95.

Reditus ad indicem
Totius
SUMMAE THEOLOGICAE
CONCLUSIONES

POWRÓT DO STRONY GŁÓWNEJ: